SCB : Julien Argenti, "Bastia 1905"

Intervista di Julien Argenti, sustenitore di l’associu Bastia 1905.

- Qualessi sò i scopi di u vostru associu ?
Bastia 1905 hè natu durante l’estate 2005, quandu simu falati in Liga 2. Vulemu fà ch’ellu fussi vivu u nostru stadiu, cum’è nanzu. Stemu in a tribuna este, detta Petrignani. Vendimu ghjacchette, sciarpe, appiccicatoghji… Avemu dinù un situ Internet . Pruvemu dinù d’urganizà spiazzamenti. Quistu annu, simu falati in Aiacciu ma avemu à pruvà di parte dinù in Grenoble o Montpellier.

- I vostri canti sò in corsu ?
Iè. Hè di primura per noi. Face parte di a tifuseria bastiaccia. À l’iniziu, sò canti taliani chì avemu adattatu in corsu. Nanzu, ci n’era pocu è micca. Hè principiatu incù Testa Mora. Permette di dà un atmosferu di più mediterraneu à u stadiu.

- Site più passiunati da u Sporting o da u ballò di modu generale ?
Per contu meiu, ghjè u Sporting ! Hè quistione d’amore, di passione. Hè una manera di campà. Avemu noi u sangue turchinu ! Ci sò chì facenu sacrifizii per andà in Furiani. Ancu puru s’è certi scontri di Liga 2 ùn ci facenu tantu sunnià.

- St’ultimi anni, ci hè statu u rimusciu trà i dirigenti è i sustenitori. Perchè ?
Ci sò stati prublemi trà i dirigenti è i sustenitori. Ùn purtavanu più i valori di u pupulu turchinu. Hè statu scioltu l’associu Testa Mora è avemu ripigliatu u so impegnu, à prò di u SCB ma sempre ind’a cuntestazione. Ad avà, ne simu sempre à sicutera. Dumandemu sempre un urganigrama chì stabilisca e respunsabilità d’ogni dirigente. Sin’à avà, ùn avemu ricevutu nunda !

- Qualesse sò e vostre rilazione incù i ghjucadori ?
Cun elli, hè propriu un antru affare. Cun tutti i quelli chì tenenu cara a maglietta turchina, ci sintimu assai bè. Pensu à i Corsi ma ancu à l’altri. Eppò, quandu ci sò i risultati cum’è quistu annu, ùn ci pudemu micca lagnà.

- Cumu hè ch’ellu ci hè di menu ghjente in Furiani ?
Ùn simu micca noi respunsevuli di a deserzione di u stadiu. Dipoi chì simu falati in Liga 2, ci hè poca ghjente, moltu più incù a sciolta di Testa Mora. Per contu nostru, ci demu di rimenu da ch’ellu volti u populu turchinu per sustene a nostra squadra.

- Ùn vi face più sunnià u Sporting ?
L’epupea di u 78, a cuppa di Francia di l’81… Tuttu què, ghjè u passatu. Incù u Sporting, ùn si tratta di sognu ma d’amore. Ci andemu perchè ci piace. Ùn capiscu micca cumu un bastiacciu possa sustene un antra squadra ! Certi dinù, vanu à u stadiu à pattu è cundizione ch’elli ci fussinu i risultati.

- Chì ne pensate di l’affare Kébé ?
Per contu nostru ùn simu micca cuncernati. Sò i media francesi chì n’anu fattu un affarone. Ùn avemu micca capitu perchè parte da nunda. Hè un secondu affare Chimbonda. Quandu si parla di Bastia è di razzisimu, si campanu i media. Invece Kébé hà dettu sprupositi. Per esempiu, hà dettu chì era statu vittime di ghjasteme razziste, annu, in Aiacciu. Avemu circatu è trovu chì tandu, ùn era mancu nant’à u fogliu di u scontru. Ùn ghjucava micca quella sera ! In quellu affare, simu noi e vittime, i paganaccii.

- I soldi piglianu una piazza tremenda in u sportu. Chì ne pensate di u « naming » ?
Palesa a perdita di i valori. Seremu pronti à perde tuttu per dui soldi ? A squadra di Le Mans hà da chjama u stadiu MMA Arena ! U prugressu finanziariu arrecatu da u naming permetterà i prugressi spurtivi ? Per contu nostru, ùn ci pudemu micca paragunà à e squadre tedesche o inglese. S’elli a facenu elli, pocu impreme perm è chì sò squadre maiò ma ch’elli lascinu e piccule squadre in pace.

- Eppuru, oghje ch’è oghje, senza soldi, ùn si pò più riesce.
Più ch’è di soldi, avemu bisognu di ghjucadori chì si battenu ! Avemu bisognu dinù di dirigenti astuti, maliziosi. Nanzu, c’era di più lesina… Per via di i dirigenti, sò parechji anni chì ùn pudemu più ricrutà ghjucadori. A sola via hè a furmazione. Sò i giovani esciuti da u centru di furmazione chì anu permessu di salvà u Sporting. Ancu s’è ùn puderemu micca mette ondeci Corsi nant’à u terrenu, ci felicitemu di a so vultata. In più di quessa, impersuneghjanu i valori di u SCB. Cun elli, ci hè a rabbia è a passione dinù. Elli sì chì sò accaniti !

- Pensate chì oghje ch’è oghje, u SCB l’averà i mezi per turnà à scumbatte in Liga 1 ?
Spergu ! Chì si di nò, u risicu sarebbe chì u SCB s’addebulisca pianu pianu in Liga 2. Quistu annu, si battenu tutti i ghjucadori è facenu partite di quelle ! Per avà, ùn ci vole micca mette li a pressione. Feremu i conti in fine di stagione. Ma hè bella sicura chì per noi, ùn sarebbe listessu affare. In L2, avemu sopratuttu u derby è unepochi d’altri scontri. Invece in L1, ogni partita t’hà un impurtenza tremenda.

Sporting Supporters Interview L1 L2 remontée