Napuleone u terzu

Hè quessu pocu stimatu da i Francesi chì preferiscenu à Napuleone u primu è chì li fàcenu rimpròveru d’avè chjappu u putere cù a forza. Tutti i prutesi republicani li sò saltati in cresta, principiendu cù Victor Hugo chì u chjamò “Napoléon le petit” è senza cuntà “Badinguet” è altri numacci. Napuleone u terzu hè mal vistu da i Francesi è dinò da i Corsi chì hanu pigliatu l’abbitùtine di vede l’affari incù ochji francesi ma ùn hè quessa a sola svista.

E puru, s’omu ci riflette hè ellu chì hà fattu entre a Francia in l’èpuca muderna. U so Regnu ùn hè statu di sicuru una rièscita sana sana è hà avutu qualchi scunfitta à l’esternu è macaru ind’u duminiu militare; ma si tutti i militari chì hanu persu guerre fùssinu stati impiccati serai stata in Francia un veru sterminiu! Principiendu cun Vercingetorix è senza scurdassi, ben intesa, di l’Amirali ancu di più sgualtri di ciarbellu chè i Generali.

Napuleone u terzu ùn hà avutu nè boni Generali nè boni Amirali nè mancu era ellu un gran generale è quessa hè un affare bellu capitu. Tutte e so spedizioni fora da Francia è ancu in Francia hanu avutu una sorte chì ùn si ne parli. Ma s’omu feghja l’affari incu ochji più appinzati, s’avede omu chì tutta a so pulìtica strangera pò esse apprezzata altrimente ch’ella ùn si hè fatta è chì ancu e so campagne, s’elle si fùssinu cluncluse cun una vittoria, serianu à ghjorni d’oghje pàgine di gloria. Ma quessa hè storia di Francia è lascieraghju à altri a primura di parlanne.

Eiu, solu vogliu parlà di a storia di Francia quand’ella hà relazioni cù u nostru paese. Ciò chì vole ci vole à mintuvà hè ch’ellu hè Napuleone u terzu chì hà fattu entre a Francia in l’èpuca muderna, ch’ellu hè ellu chì hà principiatu à fà entre u so paese in ciò chì si chjamerà a revuluzione industriale crèendu e cundizioni di u sviluppu : strade ferrate, porti, megliuranza di l’agricultura...

Certi prutenderanu chì quessa si facia ancu à l’esteru è ghjè certa. Ma ciò ch’ellu hà fattu l’hà fatta è, omancu d’ùn vulè accusà di a rabbia u cane ch’omu vole annigà, ci vole à ricunnòscela.

E ghjè cusì ch’ellu hà fattu assai per a Corsica, a terra di a so sterpa perchì ellu dinò vulia ch’omu ùn si pudissi mette in dùbbitu chì a Corsica era una terra francese. Hè ùn li si pò rimpruverà !

Francescu Maria PERFETTINI

Napoléon histoire corse corsica 19e s 19u seculu 1848