Seguità u Sporting nant’à Internet

Seguità u Sporting nant’à Internet


In più di i siti d’infurmazioni tradiziunali cum’è Corsica, Corse-Matin o Alta Frequenza, ùn mancanu micca i siti internet per quellu chì vole seguità a so squatra preferita nant’à a tela.

Ci hè ben’intesu u situ ufficiale www.sc-bastia.com . Cumplettu è rifattu à novu, cù messe à ghjornu parechje volte à settimana, prupone ancu una web tv, prova di l’interessu di u club pè e tennologie nove. Era ora ! Micca ufficiale ma cumplettu assai, Forza Bastia www.forzabastia.com presenta una grande quantità d’articuli è d’infurmazioni per tutti quelli chì cercanu à sapenne di più nant’à u Sporting. Citemu dinù u blogu Ave Bastia, http://avebastia.free.fr chì prupone anch’ellu di seguità l’attualità di u SCB, mischjendu articuli, soni è videò.

Ammintemu SCB videò http://www.scbvideo.com. A dice u so nome, ci si trova nantu… videò di u SCB, à scarica in quantità. Ci n’hè per tutti i gusti è d’epiche sfarente, da u riassuntu di l’ultima partita di campiunatu à quelli di a finale di 81 o di u parcorsu auropeanu di 78, passendu pè u famosu scontru Francia – Corsica di 1967 vintu 2 à 0 da i Corsi. Da vede à tutti i patti !

À i nostàlgichi li s’insignerà l’indirizzu di Bastia 78, cunsacratu solu à l’epupea di u Sporting di Papi, Rep è Orlanducci : http://bastia78.free.fr.

Cumplettu assai, Sempre Bastia ellu s’interessa à a storia di u SCB : http://semprebastia.forzabastia.com . Micca fiure, ma ci si trova tutti i nomi di ghjucadori, e classifiche, i risultati è e statistiche di e stagione passate.

L’associ di sustenitori facenu sente a so voce dinù nant’à u net, hè u casu di Bastia 1905 http://www.bastia1905.com. Ci si truveranu fiure, videò, resi conti, nutizie di u gruppu è ancu materiale à cumprà.

Infine ammintemu u situ Ultras Bastiacci, ch’ùn si po francà, è chì mischja magagna, attualità, resi conti di scontri è ancu un’omagiu à Pierrot Bianconi, grandissimu ghjucadore oghje sparitu : http://ultrasbastiacci.online.fr .

Ci sò dinù ben’intesu quantità di blog, fatti da partigiani turchini spessu giovani, ma di poca qualità. L’eccezzione vene da l’interessante http://retrofoot.blog.club-corsica.com chì prupone ritratti o articuli di giurnali nant’à u Sporting di l’anni 60 è 70 è ancu nanzu à buzeffu. Ci vole à felicità u so autore per u so travagliu di ricerca cun tanti fiure mai publicate. Da mette innù i vostri siti preferiti !

A maiò parte di sti siti pruponenu un spaziu di discussione o foru, induve si ritrovanu pè cummentà l’attualità è lascià i so messagi, di qualità assai ineguale… Ma ùn ci hè dubbitu chì questi quì anu pigliatu un’impurtanza ch’elli ùn avianu micca parechji anni fà. Sti spazii virtuali sò diventati assai frequentati è incunturnabili. U più cunnisciutu hè Camperemu : http://www.camperemu.com .

A rete turchina nant’à a tele hè avà tessuta bè, i Bastiacci essendu abbastanza attivi nant’à u net. Ùn ci hè ch’è da vede a quantità di videò poste nant’à i siti cum’è youtube o dailymotion. È tuttu stu picculu mondu si ritrova nant’à l’immensità di u web, fendu avanzà a cummunità virtuale bastiaccia…

Petru Paulu de Casabianca

SCB Internet supporter supporters foru ambiance Furiani stade

à ringraziavvi per avè parlatu di u "blog" AveBastia.

A lettura di vostru articulu in dicembre m'hà dattu a mutivazione per fà un situ per prisentà in poche parole u Sporting. Di poi il capu d'annu, hè "on line" à l'indirizzu: http://AveBastia.free.fr
Il blog hè sempre à http://AveBastia.free.fr/blog

tantu megliu allora !

d'un puntu gràfficu u vostru situ hè propiu bellu, saria peccatu d'arrestassi quì ! cuntinuvate !

à prestu