Sicut erat cum’è sempre...

Di sviluppu ecunòmicu in quelli tempi mancu à pensalla. Fucilate, incendii, ghjente ind’e càrcere, vèduve è òrfani à centinaie, ambiente pocu prupiziu à a messa in valore ! E, ci vole à dilla, hè tandu ch’ellu principiò u recrutamentu, più o menu vuluntariu, di sullati mandati à bàttesi in Italia “per via ch’elli capianu a lingua di u locu” cume ellu a dicia l’Imperatore ellu stessu. Hè sicura chì à un pòpulu ind’a miseria pò parè quessa una furtuna. E nisun guvernu ancu bellu dopu scagliarà à ss’usu.

Di u sviluppu qualunque nimu si ne impachjò chì, senza chì nunda cambii, a Corsica era sempre sottu à l’auturità militare o quella di u ministru di l’Internu, ùn avendu quessu altru scopu chè u mantenimentu di l’òrdine. Si vede chì l’affari sò sempre listessi.

Ind’u 1816, pigliò vigore a lege duganera chì pisò nantu à a Corsica finu à u 1912. E marcanzie chì devianu andà da a Corsica à u cuntinente francese pagàvanu tasse ma quelle chì da u cuntinente francese venianu in Corsica ne èranu franche. Quale hè chì ùn capisce ch’ella era quessa una manera di stabilisce una cuncurrenza desiquale à prò di a Francia. Quessa cuntribbuì à arruinà per u sempre tuttu sviluppu di a Corsica : i nostri beni, più impurtanti ch’omu ùn la crede, ùn avianu nisun èsitu ind’u mentre chì e marcanzie prudutte altrò entràvanu à battellate piene in l’ìsula.

L’illustrazione di sti fatti è a manera ch’elli impedianu tuttu sviluppu di piglià nàscita, hè stata sposta ind’un librettu da Ghjuvan Francescu Mignucci stampatu è pubblicatu in Bèlgica ind’u 1856. Stu librettu l’aghju ricupiatu è publicatu sanu sanu ind’u mo La Corse Française et Républicaine chì hè statu pocu vendutu perchì certi avianu poca primura ch’omu u leghjissi è parechji dinò hanu pocu laziu di vede e so edee, false, rimesse in causa. Ma si pò sempre truvà à cumprà in certe librarie o ancu dumandàmilu direttamente.

E cusì pianu pianu, a Corsica s’infrancisava è a nostra pruduzzione si spegnia. A Corsica hè, à ghjorni d’oghje, u solu territoriu à avè persu pupulazione : ind’u 1960, ne èramu falati finu à circa 160 000 persone chì campàvanu in l’ìsula. Guasi tutti d’orìgine corsa. Avà a pupulazione cresce torna cù tutti i ghjungnitici chì ci abòrdanu.

Tutt’ognunu hè lìberu, bella capita, di truvà ssa situazione nurmale è di trattà di facisti tutti quelli chì vulerianu purtacci rimediu !

Francescu Maria PERFETTINI